Matvendni eða ekki?

Ég er tilbúin að tilkynna hverjum sem er að ég sé ekki matvönd, ég borði sko flest allt (bara ekki hreinan hvítlauk og ekki piparmyntu) en svo koma dagar einsog dagurinn í dag. Ég er búin að fá að vita hvað á að vera í áramótamatinn og ég er ósátt. Mér finnst að það eigi að vera góður matur á áramótunum, mér finnst að það eigi að nýta tækifærið til að prufa að elda einhvern stórhátíðarmat sem ekki hefur verið prufaður áður, gera skrítna forrétti (en enda á góðum klassískum eftirrétt því að hitt tvennt gæti bæði verið hræðilegt).

En hérna á að vera kalkúnn. Mér finnst kalkúnn vondur. Mér finnst kalkúnn vondur þegar mamma gerir hann (amk í þessi skipti sem ég hef smakkað það), mér fannst kalkúnninn vondur þegar við vorum hérna seinast, þegar Doddi fór í búð og keypti eitthvað mystery kjöt (ég mátti semsagt ekki vita hvað það var) og eldaði það og ég fékk ekkert að vita hvað var, þá tók ég einn bita og þá vissi ég hvaða kjöt þetta væri – það er bara svona skítabragð af einu kjöti. Þá var hann með einhverjar sérmaríneraðar kalkúnabringur – eitthvað ofsaflott.

Kalkúnn á samt að vera ofsalega flottur matur, virðist ætla að verða aðaláramótamatur Íslendinga (við erum ógurlegar kanasleikjur, eins hallærislegt og það hljómar). Vandamálið við hann er ekki að það sé eitthvað sterkt bragð sem mig hryllir við einsog með hvítlaukinn og (sérstaklega) piparmyntuna, heldur finnst mér hann bragðast einsog hann sé skemmdur og þar sem ég hef alveg bragðað þetta oftar en einu sinni og oftar en tvisvar þá er ég nokkuð viss um að þetta er bara hið fræga kalkúnabragð.

Núna kvíði ég fyrir kvöldinu, ég kvíði fyrir því að þurfa að smakka (vitandi vits að mér á eftir að finnast þetta vont),  ég kvíði fyrir því að berjast við það að láta son minn (ofurmatvanda prinsinn) smakka þennan mat (sem mér finnst vondur) og ég kvíði fyrir viðbrögðunum þegar ég segi “þetta er barasta ekkert betra en áður”. Ég vakti nefnilega upp almenna hneigslun hérna fyrir 2 árum, þegar ég smakkaði og sagði “þetta er, held ég, bara skársti kalkúnn sem ég hef smakkað – en samt eiginlega frekar vondur”. Einsog fólk megi ekki tjá sig um það hvernig því finnst maturinn, eða einsog maður megi ekki mislíka kalkúnn.

Hvort heldur sem er þá er ég ekki mikið fyrir að láta tjáningarhefta mig og ég á örugglega ekki eftir að geta haldið aftur að mér ef maturinn verður vondur í kvöld.

Þreytt á hávaða og látum

Ég er orðin þreytt á hávaða og látum hérna. Mikið rosalega er ég samt stolt af mínum syni, þetta gæti verið móðurástin sem gerir mig blinda, mér finnst hann vera lang þægastur og taka tiltali lang best.

Ég velti því þó fyrir mér hvort að ég sé svona rosalega ströng mamma því að það er svo margt sem að viðgengst hérna sem myndi aldrei leifast á mínu heimili. Við Doddi erum, sem betur fer, alveg sammála um þetta – svo að við verðum sennilega hræðilega vondu foreldrarnir þegar/ef við eignumst fleiri unga. Við verðum með einhvern ofur heraga LOL ;-)

Maður sér samt alveg hvernig svona hegðun smitast út frá sér, því að við sjáum takta hjá Hrafnkel sem sjást almennt séð ekki. Takta sem við teljum að hann sé að apa eftir frændsystkinum sínum. Þetta er samt alveg synd því að þegar þau (Hrafnkell og Þórný frænka hans) taka sig til og leika fallega þá eru þau að leika rosalega fallega. En þess á milli *argh*

Ég er að verða nokkuð sátt við lúkkið á síðunni, búin að prufa nokkrar útgáfur, breyta og bæta. Er reyndar með hugmynd um eitt sem ég vil bæta við, en ég geri það þá ekki fyrr en við komum heim til Danmerkur.

Jólakortamyndir

[nggallery id=1]

Þessar myndir notaði ég í jólakortin 2008. Þessar eru reyndar aðeins kroppaðar vegna þess að myndaforritið hérna vill bara myndir sem eru í gullinsniði.

www.eddaros.com

Loksins kom að því að ég festi mér urlið mitt. Núna þarf bara að hanna, græja og gera ;-)

Þetta blog er nú að stórum hluta bara til að setja eitthvað, þar sem að mig vantar fleiri færslur til að sjá hvernig þetta lítur allt út. Ég hef svosem smá reynslu af því að fikta í wordpress eftir seinasta verkefni í skólanum.

WordPress er reyndar komið með nýja útgáfu og lítur auðvitað allt öðruvísi út (stjórnborðið) heldur en það gerði áður, svo að ég er að læra á nýtt lúkk. Þetta er samt nokkurnvegin sama stöffið, en mikil útlitbreyting.

Auðvitað lenti ég í smá installation vandræðum, veit ekki alveg hvað var málið en amk þá náði ég að laga það…. einhvernvegin….

Annars langaði mig bara til að segja, til hamingju ég með að eiga afmæli og vera orðin ennþá eldri ;-)